Денес, на седницата на Советот на Општина Бутел, беше усвоен рекорден буџет од 828 милиони денари, кој е најголемиот во историјата на општината. Градоначалникот на општината, Дарко Костовски, нагласи дека овој буџет е целосно посветен на развојот и подобрувањето на условите за живот на граѓаните.
„Овој буџет е развоен, буџет кој ќе се искористи исклучиво за потребите на граѓаните на Општина Бутел. Сите средства ќе бидат вложени во реализација на барањата и проектите кои служат на интересите на граѓаните,“ изјави Костовски.
Градоначалникот на Општината изрази разочарување што советниците од ДУИ не го поддржаа овој буџет и не ги поддржаа важните проекти, како изградбата на водоснабдување во Луботен и Лубанци, изградбата на нови патишта и други развојни проекти.
Во усвоениот буџет се издвоени 178 милиони денари за капитални проекти, кои вклучуваат:
- Изградба на парк во Радишани;
- Создавање на пешачка патека покрај реката Серава;
- Изградба на детска градинка во населбата Бутел 2;
- Реконструкција на шлепот на реката Серава;
- Реконструкција на главните патишта и голем број на помали улици;
- Изградба на нови и реконструкција на постојни атмосферски и фекални канализации;
- Изградба на нови спортски и рекреативни центри, како и нови фудбалски игралишта и детски игралишта.
Исто така, предвидени се средства за поддршка на спортските клубови, спортски стипендии и субвенции за реновирање на кровови и фасади. Друг приоритет е зголемување на фондовите за помош на социјално загрозени семејства и за организација на културни и спортски настани.
Костовски истакна дека во овој буџет не се предвидени средства за репрезентации, патни трошоци или непродуктивни трошоци. „Парите на граѓаните ќе се користат исклучиво за проекти кои ќе им служат нив,“ рече тој.
На крајот, тој изјави дека 2025 година ќе биде година на дополнителен развој за Општина Бутел, со многу нови и значајни проекти кои ќе ја подобрат животната средина за сите. „Продолжуваме за модерна, стабилна и просперитетна Општина Бутел,“ заврши Костовски.
