ЛАГОС (АА) – Најмалку 32 деца се потврдени за загинати во стампедо на карневал во југозападната нигериска држава Ојо, соопштија денес властите, јавува Анадолу.
Инцидентот се случил вчера во исламското средно училиште Башорун во главниот град Ибадан.
Портпаролот Дотун Ојелиса за новинарите потврди дека загинале 32 лица и додаде дека бројката може да варира по целосниот брифинг на полицијата.
Контактиран за нови информации, портпаролот на полициската команда на државата Ојо, Адевеле Осифесо, рече дека сè уште трае утврдувањето на точниот број жртви.
Анадолу дознава дека карневалот го организирала невладината организација „Жени во потреба на лидерство и поддршка“, а нејзината основачка Наоми Силекунола наводно е на полициско сослушување.
Омолева Азиз, сведок што бил на местото на настанот заедно со својот седумгодишен син, за Анадолу изјави дека пристигнала во 6 часот наутро кога видела толпа луѓе што се обидувале да влезе во просториите каде што се одржувал карневалот, каде што немало доволно обезбедување.
„Многу луѓе паднаа и беа прегазени, а други се онесвестија поради силниот притисок на толпата“, рече таа.
Според јавувањето на радиото за настанот, организаторите најавиле храна и подароци за 5.000 деца, но на настанот дошле 8.000 уште во 5 часот наутро.
Повеќе извори од местото на настанот рекоа дека жртвите биле згмечени до смрт од толпата додека се обидувале да се пробијат низ главниот влез на просториите.
Извор: Anadolu Agency (AA)
