СКОПЈЕ (АА) – Претседателот на Европскиот совет, Антонио Коста, истакна дека Самитот на Европската Унија (ЕУ) и Западен Балкан е многу важен поради три главни причини, од кои една е фактот дека проширувањето е приоритет, јавува Анадолу.
Поздравувајќи ги лидерите на земјите од ЕУ и Западен Балкан, Коста рече дека останатите главни причини за важноста на овој самит се припадноста кон „европското семејство, го делиме континентот, но најмногу споделуваме заеднички вредности и заедничка историја“.
Тој истакна дека веќе се посветени на проширувањето и веруваат дека тоа е најважната инвестиција за мирот и безбедноста и „водиме постепена интеграција на земјите од Западен Балкан очекувајќи ги бенефитите за нивните граѓани“.
Како примери за овие конкретни бенефити Коста ги спомена безвизниот режим, продолжениот роаминг и поедноставните и побрзи начини за плаќање.
Претседателот на Европскиот совет нагласи дека Западен Балкан во оваа деценија може значително да се трансформира преку Планот за раст.
На самитот присуствуваат премиерот на Северна Македонија Христијан Мицкоски, претседателот на Црна Гора, Јаков Милатовиќ, претседавачката со Претседателството на Босна и Херцеговина Жељка Цвијановиќ, премиерот на Албанија Еди Рама, претседателот на Србија Александар Вучиќ и претседателката на Косово Вјоса Османи.
За време на Самитот, Коста, заедно со претседателката на Европската комисија, Урсула фон дер Лајен ќе ја претставуваат Европската Унија.
Извор: Anadolu Agency (AA)
