Државниот санитарен и здравствен инспекторат (ДСЗИ) спроведува вонредна контрола на Клиниката за детски болести во Скопје по смртта на седуммесечно бебе во неделата. Директорот на Инспекторатот, Кирил Лазов, најави дека резултатите од надзорот ќе бидат објавени утре.
„Издадов налог за вонреден инспекциски надзор со сознанија за починато седуммесечно бебе, кое, според директорот на Клиниката, било донесено со сериозни оштетувања на повеќе органи. Ќе ги разгледаме сите аспекти – приемот, здравствената заштита и евиденцијата. Очекуваме утре да имаме поконкретни податоци“, изјави Лазов.
Родителите на бебето тврдат дека првично побарале помош заради црвенило на лицето и нозете. По направени лабораториски тестови, биле упатени низ различни клиники во „Мајка Тереза“ и завршиле на Детската клиника, каде што, како што велат, им било одбиено хоспитализирање. По два дена состојбата на бебето се влошила, па повторно го однеле на Детската клиника, каде што било хоспитализирано. Сепак, пет дена подоцна, бебето починало.
Министерството за здравство соопшти дека причината за смртта е сериозен синдром што зафатил повеќе органи. Телото на бебето е предадено на обдукција.
Ова е последен во серијата смртни случаи на Детската клиника кои резултираат со вонредни инспекции. Директорот Лазов потсети на случајот со петгодишно девојче кое почина минатиот месец по прием на клиниката со силна главоболка.
„По претходно наложените мерки, утврдивме дека Клиниката делумно постапила во однос на организацијата и лиценците за специјализантите. Издадовме прекршочен налог и повторно ќе спроведеме контролен надзор“, изјави Лазов.
Инспекциите сега се проширени и на други клиники во кампусот „Мајка Тереза“.
ИЗВОР: racin.mk
