Во Брисел денеска се одржа третата Меѓувладина пристапна конференција помеѓу Европската Унија и Албанија, на која официјално беа отворени преговорите по Кластерот 6 – „Надворешни односи“. Овој кластер вклучува поглавјата 30 – „Надворешни односи“ и 31 – „Надворешна, безбедносна и одбранбена политика“. Тоа е втор кластер што Албанија го отвора во преговарачкиот процес, по кластерот 1 – „Основни вредности“, отворен на 15 октомври оваа година.
Според унгарскиот министер за надворешни работи и трговија, Петер Сијарто, одржувањето на денешната конференција е уште еден значаен чекор напред во процесот на пристапување на Албанија кон ЕУ. Сијарто нагласи дека овој напредок е доказ за силниот фокус на интеграцијата на Западниот Балкан, што е клучно за стабилноста и иднината на Унијата.
Албанскиот премиер, Еди Рама, истакна дека отворањето на преговорите за вториот кластер претставува важен чекор напред во процесот на интеграција на земјата во ЕУ. Тој изрази надеж дека Албанија ќе продолжи со отворањето нови кластерите во иднина и дека ќе заврши со повеќе отворени кластери до крајот на следната година.
На конференцијата присуствуваше и еврокомесарката за проширување, Марта Кос, која ја претставуваше Европската комисија.
Во согласност со новата методологија на преговарачкиот процес, кластерот „Основни вредности“ се отвора прв, но се затвора последен, додека паралелно се водат преговорите за другите кластери: „Внатрешен пазар“, „Конкурентност и инклузивен раст“, „Зелена агенда и одржливо поврзување“, „Ресурси, земјоделство и кохезија“, и „Надворешни односи“.
ИЗВОР: racin.mk
