ИСТАНБУЛ (АА)
– Хикме ФАРУК БАСЕР
Жените возачи на амбулантните возила во Истанбул се вистински хероини кои секојдневно ги користат своите вештини зад воланот за да ги спасат животите на луѓето, но и ги рушат предрасудите за машката ексклузивност и доминација во оваа работа, јавува Анадолу.
Умухан Коџабај и Дидем Месруоглу се млади жени возачи на амбулантните возила на Брзата помош 112, кои неуморно работат дење и ноќе низ истанбулскиот сообраќаен метеж да ги доведат екипите на брзата помош и пациентите на одредената дестинација.
Нивната задача е да ги искористат своите возачки способности за да возат што е можно побрзо и побезбедно, но во општеството се препознаени како хероини кои ги рушат стереотипите дека таквите работни места се резервирани исклучиво за мажи.
Во интервју со новинарот на Анадолу, Коџабај рече дека од 2007 година работи како медицински техничар во Брзата помош 112, а во последните пет години работи како возач.
„Ја сакам мојата работа. Како жена, чест е да може да им покажеме на луѓето дека сме добри во сите области. Тешко е да се работи оваа работа во истанбулскиот сообраќај, но тоа е работа која бара одредена храброст и самодоверба. Горда сум што работам и како здравствен работник и како возач. Ова покажува колку сте силни, талентирани и вешти“, изјави 37-годишната Коџабај.
Таа истакна дека многу луѓе се чудат кога ќе видат жена возач на амбулантно возило во сообраќајот.
„Посебно изненадени се постарите сограѓани. Има и позитивни и негативни реакции и коментари, но најчесто луѓето се пријателски настроени и нѐ поддржуваат. Луѓето често нѐ поздравуваат во сообраќајот, ни аплаудираат“, рече Коџабај.
И нејзиното семејство на почетокот било загрижено и за тоа како ќе се снајде зад воланот на амбулантното возило во сообраќајниот метеж во Истанбул и со притисокот од сознанието дека вози пациенти чии животи зависат од навремена интервенција.
„Се плашеа на почетокот, но мајка ми секогаш ми беше најголема поддршка. Посакувам да има повеќе жени во оваа работа. Верувам дека ние жените можеме да работиме на сите полиња“, рече Коџабај.
Таа веќе пет години е зад воланот на амбулантните возила во Истанбул, а 29-годишната Месруоглу изјави дека од 2019 година работи во Истанбул како возач на амбулантно возило.
Таа за АА изјави дека уште од детството сакала да стане здравствен работник, а подоцна и развила љубов кон возењето и дека со среќна комбинација го остварила својот сон и се занимава со работата што ја сака.
„Да се биде жена возач на амбулантно возило е посебно чувство. Луѓето реагираат кога ќе нè видат, повеќето нè поздравуваат и охрабруваат, но има и такви кои ни велат дека ова не е работа за жени“, рече Месруоглу.
Нагласувајќи дека не се оптоварува многу со негативните коментари, Месруоглу рече дека се концентрира на својата работа и на тоа како навремено да стигне до целта во густиот сообраќај.
„Спасувањето животи е многу хумана работа со која треба да се гордееме и многу е убаво чувството да се работи тоа. Нема зборови да се опише. На сите млади жени им препорачувам да станат возачи на амбулантни возила“, рече Месруоглу.
Извор: Anadolu Agency (AA)
