Американскиот државен секретар Ентони Блинкен ѝ се заблагодари на Туркије за посредништвото и конструктивната улога во договорот меѓу Сомалија и Етиопија, известува Анадолу.
„Ѝ се заблагодаруваме на Туркије за нејзиното водство во посредувањето во овој договор“, рече Блинкен во изјавата.
Тој додаде дека американската администрација го поздравува договорот што го потврдува суверенитетот, единството, независноста и територијалниот интегритет на Сомалија и Етиопија и предвидува соработка во согласност со заедничките интереси.
Блинкен истакна дека со нетрпение очекуваат технички преговори кои ќе и овозможат на Етиопија да добие сигурен пристап до морето за взаемна економска корист, притоа почитувајќи го територијалниот интегритет на Сомалија.
Турскиот претседател Реџеп Таип Ердоган во средата во Анкара беше домаќин на неговиот сомалиски колега Хасан Шеик Мохамуд и етиопскиот премиер Абија Ахмед пред тројцата лидери да ја издадат Декларацијата од Анкара.
„Го направивме првиот чекор кон нов почеток заснован на мир и соработка меѓу Сомалија и Етиопија“, рече Ердоган на заедничката прес-конференција во турската престолнина.
„Лидерите на Сомалија и Етиопија ја потврдија својата почит и посветеност на меѓусебниот суверенитет, единство, независност и територијален интегритет, како и принципите содржани во меѓународното право, Повелбата на Обединетите нации и Уставниот акт на Африканската унија“, соопшти Дирекцијата за комуникации на турското претседателство.
Двете источноафрикански држави се во расправија откако Етиопија на 1 јануари оваа година постигна договор со сомалискиот регион Сомалиленд за користење на пристаништето Бербера на Црвеното Море. Туркије вложи напори да се стави крај на тензиите меѓу двете земји.
Извор: Anadolu Agency (AA)
