Ноќеска, пред полноќ, до медиумите стигна кусо известување од Град Скопје, во кое велат дека и покрај некакви притисоци, ЈСП ќе вози во полн капацитет. Но, сликата утрово не ја оправда најавата од Град Скопје. Автобуси немаше и тоа и на подолгите релации кои го поврзуваат едниот со другиот крај на главниот град.
Граѓаните реагираат дека повеќе од 40 минути се чекало на „5-ка“ или „15-ка“.
Според информациите ЈСП се уште е без нафта. Претпријатието кое има проблем со автобуси и има долгови не набавило нафта, велат за ТВ 24 од репрезентативниот синдикат. Од Независниот синдикат, пак, се жалат дека повеќе од три месеци се соочуваат со недостаток на нафта, но ситуацијата ескалираше вчера кога воопшто не беше испорачана нафта во двете автобази. Од синдикатот не знаат што се случува, велат ова е голем срам за градот.
ТВ 24 се обиде да стапи во контакт со директорот на ЈСП и со кабинетот на градоначалничката на Скопје, како градскиот превоз остана без нафта. Оттаму не одговорија на нашите повици и пораки. Од Владата пак велат дека понудиле пред неколку месеци како Влада помош, но за жал Град Скопје и градоначалничката на Скопје покажале целосно отсуство на внимание за проблемите на градот.
Извор: 24vesti.mk
