БЕРЛИН (АА) – Џамијата Фатих во градот Шробенхаузен во Германија собра многу симпатии кај јавноста откако ги отвори вратите за градинка поврзана со Католичката црква, што беше оштетена во јунските поплави, јавува Анадолу.
Џамијата Фатих во Шробенхаузен, град на околу 80 километри од Минхен во Горна Баварија, работи во рамките на Турската исламска заедница во Германија (ДИТИБ).
Градинката Марија Вард, која работи поврзано со Католичката црква, бараше нова локација откако беше значително оштетена во поплавите.
– Место за градинка –
Во пресрет веднаш излегле претставниците на џамијата Фатих, кои им рекле дека можат да им обезбедат место за градинка.
Раководството на градинката го прифати предлогот, па на градинката ѝ беше ставена на располагање нова конференциска сала од 400 метри квадратни во рамките на џамијата која беше отворена на 4 октомври.
Многумина во Германија го пофалија овој гест на претставникот на џамијата Фатих, а весникот „Донау куриер“ објави дека ова е „уникатен пример“, додавајќи дека и родителите на децата се презадоволни од решението и ваквиот развој на настаните.
– Единство и солидарност –
Менаџерката на градинката, Зита Етл, во изјава за весникот вели дека е многу среќна што нашле привремено решение и им се заблагодари на сите кои придонеле да се оствари тоа.
Асир Озен од ДИТИБ во Шробенхаузен, кој ја загуби сопругата во поплавите, рече дека споменатата градинка претрпела големи штети и дека сакале да понудат решение за сите да бидат задоволни.
Тој истакна дека во градинката има повеќе од стотина деца, а од родителите добиле многу добра повратна информација.
Рече дека овој пример покажува дека муслиманите живеат во единство и солидарност со сите граѓани на Германија.
Извор: Anadolu Agency (AA)
