Кремљ го демантираше извештајот на американски медиуми дека рускиот претседател Владимир Путин и новоизбраниот претседател на САД Доналд Трамп разговарале по телефон минатата недела за конфликтот во Украина.
Портпаролот на Кремљ, Дмитриј Песков, изјави дека извештаите за тоа се целосно невистинити.
– Ова е најјасен пример за квалитетот на информациите што неодамна се објавуваат дури и во прилично угледни весници. Ова е целосно лажно. Ова е чиста фикција, ова е едноставно лажна информација. – Дмитри Песков, Портпарол на претседателот на Руската федерација
Британскиот министер за одбрана Џон Хили пак денеска изјави дека очекува Америка, заедно со нејзините западни сојузници, да продолжи да дава помош за Украина се додека е потребно.
– Што се однесува до претседателот Трамп, тој признава дека земјите добиваат безбедност преку сила, исто како што тоа го прават сојузите како НАТО, и очекувам САД да останат заедно со сојузниците како што Обединетото кралство стои со Украина онолку долго колку што е потребно за да надвладее инвазијата на Путин. – Џон Хили, Британски министер за одбрана.
Се огласи и францускиот министер за надворешни работи Жан-Ноел Баро кој вели дека Украинските сојузници не треба да прејудицираат како новата американска администрација ќе се справи со војната во Украина, додавајќи дека Париз верува дека западните сили мора да останат обединети во поддршката за Киев. Вашингтон Пост инаку објави дека Трамп во присуство на Елон Маск разговарал и со украинскиот претседател Зеленски, но од Киев не дојде никаква реакција.
Извор: 24vesti.mk
