Имаме преубава земја но самите не знаеме што имаме во неа. Потребно е мапирање на сите културни вредности кои ги имаме – фолклор, вински туризам, музика, археологија и создавање на рути кои ќе ги задржат туристите транзитирајќи низ државава на пат кон други дестинации.
Ова се дел од главните пораки на денешната конференција за развивање на културниот туризам во Македонија.
Министерот Зоран Љутков, вели дека во моментот културата не придонесува кон економскиот развој и мора да се развие стратегија преку која таа ќе има значаен придонес кон буџетот на државата. Тој оценува дека развојот на рути за транзитен културен туризам во Македонија како на пример долж течението на Вардар каде имаме и автопатско решение и каде постојат археолошки наоѓалишта, Демиркапискиот локалитет за спортско искачување по карпи, винарии како и карактеристични земјоделски производи како калинките од Гевгелија е важен дел од новата стратегија, но пред тоа, мора да се донесе нов посебен закон кој ќе ги спојува културата и туризмот.
Во Македонија се организираат пан-Балканско познати и добро посетени музички фестивали како Д-фестивал во Дојран, Таксират во Скопје, Балканскиот етно-фјужн фестивал “Локум фест-музика и традиција“ во Битола, кои се исклучително важни за локалната економија, развој и промоција на градовите, но нивните организатори се пожалија дека функционираат надвор од системот и ретко можат да се потпрат за помош и поддршка од министерството за култура и релевантните институции, посочувајќи го токму конкурсот за култура како „осакатувачки„ за развој на фестивалите.
Панелистите на конференцијата апелираа државата да се ангажира околу уредување и зачувување на тоа што е системски занемарено како запуштениот археолошки локалитет Вардарски рид и куќата на кралицата на ромската музика Есма Реџепова која наместо да биде претворена во музеј сега зјае ограбена и искршена.
Извор: 24vesti.mk
