Министерството за јавна администрација не подготува Закон за правична застапеност што би го заменил балансерот. Министерот Горан Минчев истакна дека не треба да се брза со вакво законско решение и вели дека не ја видел нацрт-верзијата што ја подготуваат владините парнери од коалицијата ВРЕДИ.
Минчев додаде дека нема ниту работна група, но пратеникот Халил Снопче го демантира.
„Не, се уште не е формирана таква работна група, но јас сум сигурен дека во Владата има политички капацитет и можност да се дојде до едно сериозно, системско и квалитетно решение. Повторувам, не треба да се брза“, вели Горан Минчев.
„Сакам да го демантирам министерот ако рекол такво нешто, не сум го слушнал – таква работна група постои и се состои од претставници на коалицијата ВЛЕН, ВМРО-ДПМНЕ и од ЗНАМ. Претставник на ЗНАМ е самиот министер, господинот Минчев и досега таа работна група веќе има две средби одржано“, вели Халил Снопче.
Иако Минчев и Снопче не се со ист став дали таква група постои, сепак се согласни дека правичната застапеност е уставна категорија. Пратеникот одговори и зошто досега предлогот на коалицијата ВРЕДИ не е поставен на јавна дебата, иако според најавите дебатата веќе требаше да се одржи.
„Уставната гаранција за правична и еднаква застапеност треба да се реши со закон, значи формирана е работна група да има предлог којшто ќе биде сеопфатен и сеприфатлив, да не одиме еднонасочно“, вели Халил Снопче.
Министерот Минчев пак, вели дека најверојатно во иднина ќе се подготува Закон за правична застапеност, но не ја исклучува можноста балансерот да биде вграден преку измени во веќе постоечките закони за администрацијата, а не преку нов закон.
ИЗВОР: ТВ 21
