Министерството за образование и наука и општина Карпош најавија средба и повторно ќе преговараат. Проблемот во општина Карпош се’ уште не е надминат, според министерката за образование и наука Весна Јаневска.
За буџетот за следната година, министерството планира да одвои повеќе средства, не само за Карпош туку и за други општини кои се во слична ситуација, а градоначалникот Стевче Јакимовски напоменува дека МОН во 2022, 2023 и 2024 година континуирано ги намалува предвидените средства за образование за оваа општина.
„Жал ми е што треба да соопштам дека искористени се блок дотациите за оваа година. Оваа година општина Карпош со ребалансот добила 18 милиони денари повеќе, за што верувам дека не се сосема доволно и искрено се надевам дека ќе изнајдеме некакво решение со градоначалникот, се разбира со негови поголеми услоги отколку од Министероството за образование и наука и пак станува збор за закон.“ – Весна Јаневска министерка за образование и наука.
Градоначалникот на Карпош, Јакимовски вели дека во училиштата од денеска има греење. Бројот на учениците е зголемен во Карпош и очекува со новиот буџет за 2025 година, да се зголемат средствата, односно да се обезбедат доволно средства за да може општината да ги плати долговите, во висина од 8 300 000 денари.
„Министерството има исплатено 6 800 000 денари. Целата оваа сума ќе ја пуштиме до сите подрачни единици, односно до сите подрачни училишта. Ској од нив, првенствено ќе гледа да ги подмири сметките за греење но и натаму ќе остане долг до осум милиони и триста. Скоро уште два милиони денари. Згора на тоа за наредниот временски период ќе доаѓаат нови сметки, јас не знам дали се овие средства исплатени за до Нова година или се средства само за овој месец. Очигледно дека треба да седнеме да се разбереме.“ – Стевче Јакимовски градоначалник на о.Карпош.
Минатата недела, министерката, Весна Јаневска истакна дека блок-дотациите за училиштата се исплатени, а градоначалниците и директорите на училиштата треба да се организираат за да ја спроведат не само грејната сезона, туку и се’ друго што треба. Додека пак, според првиот човек на Регулаторна комисија, Марко Бислимовски, одлука на потрошувачот е кога ќе се вклучи на системот за парно греење и смета дека во таа насока е и потегот на општината.
Извор: 24vesti.mk
