По убиството на лидерот на Хамас Јахја Синвар, либанската милитантна група Хезболах соопшти дека влегува во нова, ескалирачка фаза во војната против Израел. Техеран, пак повикува на јакнење на духот на отпорот.
Лидерот на Хамас, кој со нападот на 7 октомври лани ја почна војната во Појасот Газа, беше убиен од припадници на израелската армија. Израел објави снимка за која тврди дека се последните моменти од животот на Синвар. Синвар имал панцир на себе, пронајдени биле гранати, како и над10 илјади долари. Негови ДНК примероци се пронајдени во тунелите во близина каде што војниците ги пронајдоа телата на шестмина израелски заложници на крајот на август.
Израелскиот премиер Бенјамин Нетанјаху порача дека оската на теророт изградена од Иран се урива, а убиството на Синвар, го нарече почеток на крајот на војната во Газа.
„Ги израмнивме нашите сметки. На злото му е зададен удар, но нашата задача сè уште не е завршена.“ – Бенјамин Нетанјаху премиер на Израел.
Западните лидери сметаат дека неговата смрт нуди можност да се стави крај на конфликтот. Американскиот секретар за одбрана, Лојд Остин, рече дека смртта на лидерот на Хамас е извонредна можност за воспоставување прекин на огнот во Газа.
„Смртта на Синвар е извонредна можност за воспоставување траен прекин на огнот и крај на оваа страшна војна, но овозможува и итна хуманитарна помош за луѓето во Газа.“ – Лојд Остин секретар за одбрана на САД.
Еден од лидерите на Хамас, Калед Мешал веќе е назначен за вршител на должноста лидер на ова милитантно движење. Тој ќе биде одговорен за целата комуникација со клучните страни вклучени во преговорите и прашањата за затворениците. ОН, пак, повторно предупредуваат на тешката хуманитарна ситуација во Појасот Газа, каде што проценуваат дека околу 350 илјади Палестинци ќе се соочат со глад оваа зима, бидејќи испораката на помош во енклавата значително опаѓа.
Извор: 24vesti.mk
