Имало ли пропусти во лекувањето на 14-месечното дете за кое неколку пати била одбивана хоспитализација на Клиниката за детски болести, по што родителите се упатиле кон „Козле“, но таму состојбата се влошила и било вратено на Клиниката за детски болести и итно хоспитализирано.
По само неколку часа на интензивна нега, детето подлегнало на последиците од бронхопневмонија и починало.
По овој настан, на терен излезе и Државниот санитарен и здравствен инспекторат со вонреден инспекциски надзор.
Министерот за здравство Арбен Таравари во изјава за медиумите вчера истакна дека докторите сепак направиле превид при проценката за прием и ненавремена проценка на тежината на болеста.
„Комисијата за стручен надзор нотираше превид во проценката за потреба од хоспитализација при вториот преглед на бебето на клиниката. Додека во Козле е констатирана неадекватна и ненавремена проценка на тежината на респираторните потешкотии и третманот“, изјави Таравари.
Сепак, попладнево со соопштение се огласи и Клиниката за респираторни заболувања кај децата „Козле“, од каде изразуваат уверување дека не било направено никакво неправилно постапување или лекување.
„Стручниот колегиум при Јавната здравствена установа Универзитетска клиника за респираторни заболувања кај децата ‘Козле’, одговорно тврди дека сите лекари кои биле инволвирани во лекувањето на детето ги преземале и реализирале сите расположливи и потребни прегледи и иследувања и дадена е соодветна терапија според медицинските протоколи. Не е утврден пропуст во постапувањето и лекувањето на детето, во согласност со целокупната медицинска документација како доказ во Клиниката“, велат од таму.
ИЗВОР: ТВ 21
