Дали Протоколот со Бугарија, ќе биде фокус на македонската влада, за гаранции од ЕУ? Министерот Муртезани денеска не даде конкретен одговор – какви гаранции ќе бара владата од Брисел, во писмото кое ќе го испрати до европските институции.
Вели дека писмото се уште не е напишано – а кога ќе биде, владата нема да брза да го објави, пред да завршат изборите во Бугарија. Порача дека не е работата на ЕУ да гарантира нешто, туку дека тие како Влада се должни да го заштитат интересот на граѓаните и државата
– Ние се обидуваме да го заштитиме процесот после уставните измени. И премиерот во неколку наврати и владата, има спомнато дека не е спорно да се донесат уставните измени, меѓутоа ние сакаме да бидеме сигурни, дека процесот, понатаму, нема да биде предмет на дополнителни блокади. – Орхан Муртезани министер за европски прашања.
Муртезани повтори дека во Брисел нема слух за уставни измени со одложено дејство, иако не ја исклучи можноста тие повторно да бидат дел од владината идеја, која ќе се презентира во ЕУ. Сепак, според Муртезани, фокусот на владата сега е да се осигури дека Договорот за добрососедство и Протоколите, поради различната унилатерална интерпретација на Бугарија, нема да станат и европска позиција.
– Ако ги гледате, не Договорот за добрососедство туку Протоколот со Бугарија, гледате дека има огромни можности за дополнителни блокади. Ние како влада, ако сметаме дека постои таков ризик и дека со надминување на сегашниот чекор само ќе ја поместиме уште еднаш блокадата понатаму, треба да ги исцрпиме сите можности за да обезбедиме некакви гаранции дека нема да бидеме повторно предмет на блокади. – Орхан Муртезани министер за европски прашања.
Орхан Муртезани денеска порача дека тече рокот од 6 месеци, кој коалицијата Вреди и го даде на владата, за да понуди решение за излез од блокадата на евроинтегративниот процес. Изјави дека сега сѐ уште е четвртиот чесец, а кога ќе стигне крајот, владиниот коалиционер ќе ги разгледа алтернативите и ќе одлучи какви чекори ќе преземе.
Извор: 24vesti.mk
