Претседателот на СДСМ, Венко Филипче, во своето гостување на „Само интервју“ ја обвини ВМРО-ДПМНЕ за сериозни пропусти во управувањето и за влошување на безбедносната состојба во државата.
„Сè она што до сега го констатиравме е дека го прави ВМРО-ДПМНЕ, дека не прави ниту една друга партија, а тоа е дестабилизација, провокација, влошување на безбедносната состојба на границата со Косово, огромен број на убиства коишто не се расчистени. Имаат 10, ми се чини, во изминатиот период откога е ВМРО-ДПМНЕ на власт“, посочи Филипче.
Филипче ја нагласи и целосната безидејност на владејачката партија во однос на економските политики и зголемувањето на платите, додавајќи:
„Немање никаква идеја да се зголемат платите, единствено нешто со кое тие се фалат се некои инвестиции коишто ги спремила нашата Влада во изминатиот период.“
Сепак, тој признава два проекти како автентични на ВМРО-ДПМНЕ, за кои јавно им оддаде признание:
„Мора да им се признае и за два проекти коишто се нивни автентични и тука навистина треба да им се честита – им честитам и јас лично – а тоа е враќањето на споменикот на Ќосето и враќањето на оградата на Владата. Тоа се навистина проекти коишто се автентични на ВМРО-ДПМНЕ и тоа го направија како што треба.“
Претседателот на СДСМ повторно го истакнува недостигот на конкретни политики и стратегии од страна на ВМРО-ДПМНЕ, потенцирајќи ги нивните неуспеси во клучните области на управувањето.
ИЗВОР: racin.mk
