Триесетдневен притвор за мажот кој е осомничен за нападот на српските момчиња во Косово

Во соопштението на Основниот суд во Урошевац се наведува дека постои освовано сомнение оти осомничениот Азем Куртај со умисла се обидел да им ги одземе животите на Стефан Стојановиќ (11) и Милош Стојановиќ (21), откако по вербалната расправија која се случила на местото на настанот, тој извадил огнено оружје и пукал двапати при што ги повредил момчињата

Основниот суд во Урошевац му изрече триесетдневен притвор на 33-годишниот Азем Куртај кој е осомничен дека на 6 јануари пукал и ги ранил двете момчиња од српска националност во Штрпце.

Во соопштението на Судот се наведува дека постои освовано сомнение оти Куртај со умисла се обидел да им ги одземе животите на Стефан Стојановиќ (11) и Милош Стојановиќ (21), откако по вербалната расправија која се случила на местото на настанот, тој извадил огнено оружје и пукал двапати при што ги повредил момчињата.

„Кога со својот автомобил пристигнал на влезот во селото, забележал неколку граѓани на крајот од патот и за да ги избрка, свикал. Не можејќи да продолжи, го запрел автомобилот и по вербална расправија, извадил револвер и испукал двапати нанесувајќи им телесни повреди на момче и млад човек. Тие прво биле упатени во Здравствениот дом во Штрпце, а потоа во болницата во Грачаница“,

се вели во соопштението на Судот.

Оттаму се додава дека обвинетиот предизвикал и голема опасност по животот на луѓето, откако на 6 јануари во Брезовица, општина Штрпце со своето оружје испукал пет пати во воздух поради тоа што имало застој на коловозот.

„Откако со својот автомобил „голф в“ не можел да се приклучи на патот што води кон Ски-центарот Брезовица поради застој на коловозот, свртел кон Штрпце и со револвер „мосберг“ пет пати испукал во воздух, со што извршил кривично дело ‘создавање општа опасност’“,

се додава во соопштението.

Судија на претходна постапка го одобри барањето на државниот обвинител за определување мерка притвор против обвинетиот заснована согласно одредбите од Кривичниот законик на Република Косово и на истиот му е одредена мерка притвор во траење од еден еден месец.

Претходно, осомничениот беше сослушан на затворена судска седница во врска со инцидентот.

По седницата, адвокатот на осомничениот, Наим Ферати, изјавил дека неколку секунди пред инцидентот кој се случи пред два дена, неговиот клиент бил нападнат со некој предмет и бил навредуван, по што пукал во самоодбрана. За да се заштити од опасноста, според адвокатот Ферати, неговиот клиент пукал двапати, но не во толпата која наводно му се заканувала, туку еднаш во воздух и еднаш во асфалтот.

Нападот на српските момчиња во Косово беше причина денеска во Штрпце да се одржи масовен протест на косовските Срби.

Протестот беше инициран од политичката партија на српското малцинство во Косово, Српска листа, а нејзиниот претседател Горан Ракиќ на денешниот протест порача дека оти на северот на Косово продолжува „диктаторкскиот режим на косовскиот премиер Албин Курти“.