АНКАРА (АА) – Директорот на Националната разузнавачка агенција (МИТ) на Туркије, Ибрахим Калин, денеска во Анкара разговараше со челниците на Политичкото биро на Хамас за најновата ситуација во преговорите за прекин на огнот меѓу Израел и Палестина, јавува Анадолу.
Според информациите добиени од безбедносни извори, на состанокот на челникот на МИТ, Калин, со челниците на Политичкото биро на Хамас се разговарало за прашања како што е финалната точка во преговорите за прекин на огнот меѓу Израел и Палестина и размената на заробеници.
Разговарано е за конкретните чекори што може да се преземат за да се обезбеди траен прекин на огнот во Газа, каде што се одвива хуманитарна трагедија, и за доставување на поголема количина хуманитарна помош во регионот.
Истакнат е конструктивниот и позитивниот став на Хамас во преговарачкиот процес, и нагласено е дека израелското воведување нови услови во текстот на предлогот, кој е поддржан и со резолуциите на Советот за безбедност на Обединетите нации (СБОН), го отежнува процесот на воспоставување прекин на огнот.
Нагласено е дека МИТ продолжува да одржува контакти со страните и сите релевантни актери за обезбедување прекин на огнот.
МИТ презема важна улога во овој процес и води интензивна дипломатија со сите актери, особено со високото раководство на Хамас, Израел, Египет, Катар и Соединетите Американски Држави (САД).
Извор: Anadolu Agency (AA)
