Првата претседателска дебата меѓу претседателските кандидати на републиканците и демократите, Доналд Трамп и Камала Харис, се одржа синоќа во Филаделфија.
Дебатата започна со ракување на двајцата кандидати на иницијатива на Камала Харис, која му пријде на Трамп, му подаде рака и се претстави. Трамп го прифати ракувањето. Kамала харис, која е актуелна потпретседателка на сад, истакна дека Трамп и таа имаат две многу различни визии за Америка. Таа кажа дека е фокусирана на иднината, а Трамп на минатото.
– Не се враќаме назад. Можеме да трасираме нов пат напред. – рече Харис.
Републиканскиот кандидат и експретседател на САД, Доналд Трамп, пак, ја обвини актуелната американска потпретседателка дека во годините додека е на власт не направила ништо од политиката за која се залага.
– Не можеме да ја жртвуваме нашата земја поради лоша визија. Ние сме народ што пропаѓа и кому му се смеат низ целиот свет. – рече Трамп.
Во фокусот на дебатата беше и економијата. Харис рече дека е израсната како дете од средната класа и дека ќе биде фокусирана на создавање економија на можности. Остро го критикуваше трамп за политиката за која рече дека ќе ги зголеми трошоците за американците.
– За овие избори, важно е да свртиме нова страница и да се фокусираме на сериозните прашања за цените на становите и храната. – рече Харис.
Трамп го отфрли тоа и рече дека ќе се фокусира на царините за увоз од странски земји. Доналд Трамп пак зборуваше за имиграцијата велејќи дека луѓето се доселуваат во земјата. Во првите три години од мандатот на Бајден, според тврдењата на трамп, во сад влегле над 20 милиони илегални мигранти.
Во однос на војната во Украина, Трамп рече дека доколку тој останел претседател немало да дозволи започнување на војната. Ги обвини Бајден и Харис оти ѝ дозволиле на Америка да ја финансира војната значително повеќе од ЕУ. На прашањето дали сака Украина да победи во војната, Трамп рече дека сака да ја прекине војната.
– Доколку јас останев претседател немаше да дозволам започнување на војната. – рече Трамп.
На ова, демокртската кандидатка Харис рече:
– Да беше Трамп претседател, Путин сега ќе седеше во Киев, со поглед кон Полска и остатокот од Европа.
A, Трамп возврати:
– Путин би седел во Москва, посреќен отколку што е сега.
Извор: 24vesti.mk
