Новиот филм на италијанскиот режисер Паоло Сорентино, „Партенопе“ ќе го отвори 45. издание на Интернационалниот фестивал на филмска камера (ИФФК) „Браќа Манаки“ во Битола, а ќе го затвори дебито на Димитар Оровчанец „Убиј ги прво децата“ . Фестивалот годинава ќе се одржува од 21 до 27 септември.
Двата филма ќе се прикажат во Официјалната селекција за наградата „Камера 300“.
Светската премиера на „Партенопе“, со Гери Олдман и Стефанија Сандрели во главните улоги, беше на годинашниот Кански филмски фестивал, а на „Убиј ги прво децата“ на Сараевскиот филмски фестивал.
„Убиј ги прво децата“ во продукција на „Трис филмс“ и „ДМФ филмс“, со продуцентите Атанас Георгиев и Дејан Илиев, беше поддржан со 20 милиони денари (325 илјади евра) на Конкурсот во прв рок за 2020 на Агенцијата за филм, а се снимаше во 2022 во Скопје. Во филмот играат Миа Жиро, Стефан Спасов, Мартин Ѓоргоски, Адриан Азири, Александар Ѓоргиески, Стефан Вујисиќ и други. Камерата е на Владимир Самоиловски, дизајнер на продукција е Сашо Блажевски, костимите се на Ина Чолак, сценографија на Калина Игновска, монтажата на Софија Самоиловска, а музиката на Игор Василев-Новоградска.
Режисерот Оровчанец, кој во 2003 го сними долгометражниот документарец „Патот на Олга“, изјави дека „Убиј ги прво децата“ е акциона комедија, приказна за тројца тинејџери, една надмена балерина, нејзиниот лудо вљубен дечко и неговиот луциден најдобар другар со украден пиштол, кои во едно деноноќие заглавуваат во најтемните лавиринти на криминалното подземје поради погрешно земен телефон, кој содржи компромитирачко видео.
Во програмата „Камера 300“ вкупно има 12 филмови, меѓу кои се: „Ветената земја“ на режисерот Николај Арсел, со Мадс Микелсен во главната улога, „Наставничка канцеларија“ на германскиот режисер Илкер Чатак, кој имаше номинација за Оскар во категоријата најдобар странски филм, како и „Зона на интерес“ на Џонатан Глејзер кој доби два Оскара, за најдобар странски филм и за најдобар звук.
Б. НЕСТОРОСКА
ИЗВОР: sdk.mk
