АНКАРА (АА) – Бројката на загинати во земјотресот на југот од Туркије се зголеми на 24.617, соопшти синоќа потпретседателот на оваа земја, Фуат Октај, известува Анадолу.
Потпретседателот Октај рече дека во рамките на истрагата за недостатоците во изградбата на станбените објекти е утврдена одговорност на 131 лице, од кои некои веќе се приведени, додека по некои се трага.
Од подрачјето погодено од земјотресот во други делови на земјата евакуирани се повеќе од 86.000 лица.
Два силни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик, и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
Бројни спасувачки екипи сè уште ревносно работат на пребарување и спасување на луѓето затрупани во урнатините на зградите.
Во овие земјотреси што силно ги потресоа и северните делови на Сирија, животот го загубија повеќе од 3.500 лица, а над 5.200 се повредени.
Извор: www.aa.com.tr
