Актуелните проблеми со системот за електронска наплата на билети и нефункционалните валидатори во возилата на ЈСП неоправдано се поврзуваат со компанијата Маргенто од Словенија, преку објавување фотографии од валидаторите од наше производство, велат од оваа компанија и нагласуваат дека нивните обврски кон ЈСП завршиле уште во јануари годинава.
„Маргенто, како глобален дизајнер и имеплементатор на решенија за наплата во јавниот превоз, ги разбира потребите и проблемите на граѓаните, но сите обврски на Маргенто кон ЈСП Скопје завршија на 31.01.2024 година. ЈСП Скопје во постапка за јавна набавка, во која предмет не беше набавка и испорака на нова опрема, туку само одржување на постојната опрема, одбра друг понудувач за периодот од февруари 2024. Исто така, сакаме да истакнеме дека новите ‘заштитени’ валидатори кои се инсталираат во возилата на ЈСП Скопје и сѐ уште не се во функција, не се од наше производство. Оттаму, целосно е некоректно актуелните случувања и проблеми во јавниот градски превоз да се отсликуваат со прикажување на фотографии од опремата од наше производство, во момент кога функционалноста и одржувањето на истите е обврска на новоизбран економски оператор. Поради сето ова, ја известуваме јавноста дека нашата компанија нема никаква поврзаност со актуелните случувања и ги молиме медиумите моменталните проблеми во јавниот градски превоз да не ги илустрираат со фотографии од нашата опрема“, велат од компанијата за фотографиите кои ЈСП Скопје ги објави на нивната фејсбук страница.
Компанијата Маргенто, заедно со Македонски Телеком, во 2014 година имплементираше напреден систем за електронска наплата на билети во возилата на ЈСП Скопје и на приватните превозници.
„Овој систем беспрекорно функционира веќе десет години. Во тој период, со голема посветеност и постојан развој овозможивме ЈСП Скопје да изврши наплата на билети во износ од над 100 милиони евра, а картичката СКОПСКА стана симбол на јавниот градски превоз“, се вели во реакцијата.
Од јавното сообраќајно претпријатие „Скопје“ (ЈСП) вчера појаснија дека е во тек надградба на Системот за автоматска локација на возила и електронска наплата во автобусите на ЈСП и приватните превозници, согласно договорот со конзорциумот, софтверската компанија „Аитоникс“ – Македонија.
Поради оваа причина новите валидатори се во моментов заштитени, бидејќи сè уште не се во функција, а со цел да се заштитат до моментот додека не се заврши втората фаза во сите автобуси – соопштија од ЈСП.
ИЗВОР: racin.mk
