На десетина дена пред стартот на новата учебна година почна дистрибуцијата на одобрените и испечатени учебници и наставни материјали кои ќе се користат во основните и средните училишта оваа учебна година…Испораката како што велат од ресорното министерство треба да биде заокружена пред првиот училишен ден. Министерката за образование и наука Весна Јаневска ги предупреди училишните раководства да организираат навремен прием на учебниците.
Дистрибутерите немаат должност да доаѓаат по втор или по трет пат во училиштето за да ги достават учебниците и затоа, било какви изговори на директорите за одложување на приемот се неприфатливи.
Во претстојната учебна година учениците како досега, ќе се снаоѓаат со материјали за странските јазици но и предметите за јазикот и културата на заедниците, за кои во најголем дел поради лошиот квалитет на предложените учебници, истите не се одобрени. Материјалите за јазиците ќе бидат објавени на веб страната на Бирото за образование. Од 1 септември 124 основни и средни училишта ќе почнат со настава во една смена а надлежните велат дека едносменска настава е приоритет и во следните неколку години ќе се вршат прилагодувања на сите училишта. Оваа учебна година се укинува и пролетниот распуст.
Извор: 24vesti.mk
