Дали претседателот на Собранието Африм Гаши со себе носел патен налог и поседувал официјална документација за да може да оди по невеста со службено возило надвор од државата, прашуваат од Либерално-демократската партија откако на социјалните мрежи се појави видео од колона на автомобили, меѓу кои наводно и службеното возило на собранискиот претседател, за кого се тврди дека како сват заминал по невеста во Косово.
Во писмената реакција објавена денеска, од ЛДП бараат одговори дали ако собранискиот претседател Африм Гаши имал патен налог, по кој основ е издаден истиот, за која намена, во колкаво времетраење и колку сето тоа ги чини граѓаните со чии средства од даноците се одржуваат службените возила. Од партијата изразија загриженост поради, како што велат, континуираното непристојно однесување и злоупотреба на службената положба на претседателот на Собранието.
Предлагаат сите службени возила да бидат видливо и јасно обележани со иста боја, како такси-возилата во градот Скопје. Ваков предлог имаше и претходниот состав на антикорупциската комисија, но тој досега не е имплементиран. Полицијата веќе го проверува овој случај за разрешница на дилемата – дали има злоупотреба на државните возила.
Извор: 24vesti.mk
