Мислам дека суштинско репреговарање со Бугарија не е возможно во моментот, мислам дека се цели кон некое симболичко преговарање со што би се намалил тој бугарски диктат и бидејќи претходно имаат најавено дека немаат ништо против Бугарите да влезат во Устав. Јас на ова гледа оптимистички, како на подотворена врата. Тоа нема да има суштинско значење, но ќе има симболичко за новата влада, вели политикологот Борјан Ѓузелов во СТУДИО 10 на ТВ 24.
– Кога би се покажала малку добра волја од другата страна на новата влада ќе и биде полесно да ја голтне кнедлата оти е сега е власт и во позиција да ги решава проблемите. ВМРО-ДПМНЕ играше нефер во последните години кога велеше дека ќе се укинат договорите и дека ќе репреговара оти кога си на власт си соочен со реални проблеми. Ја повикувам јавноста да не ги повикува на одговорност за ова, за да не се случи да направат поголема штета од која сите ќе трпиме, вели Ѓузелов.
Ѓузелов во врска со Преспанскиот договор и прашањето со неприфаќањето на уставното име Северна Македонија од ВМРО-ДПМНЕ вели дека новата власт сега е во обид да балансира, да ја задоволи домашната јавност, а притоа да не го наруши меѓународниот договор.
– Тенденцијата на зголемувањето на парламенталното мнозинство и покрај тоа што ВМРО-ДПМНЕ и онака има мнозинство, а за да се дојде до две третини од пратениците, мене ми се чини дека е маневар за спроведување на уставните измени, а во таа смисла сум умерен оптимист, вели Ѓузелов.
Во однос на користењето на придавката „северномакедонски“, Ѓузелов вели дека дека тоа не е договорено во Преспанскиот договор и не треба да се користи, а кога го користат странски претставници треба да реагира македонската дипломатија.
Во вррска со реформите што треба да се спроведат во државата Ѓузелов вели дека ние мораме да сметаме дека тие реформи се за нас, а не се за ЕУ што претходната власт го заборави.
– Затоа претходната власт ги загуби изборите, и онаа на Груевски и оние на Заев и Ковачевски, па новата власт би требало да научи од нивните грешки кога станува збор за заложбите за унапредување на животот во земјата во смисла на подобрување на институциите, вели Ѓузелов, но предупреди да не се избрзува со измените како што се избрза со измената на законот за министерствата.
Извор: 24vesti.mk
