Високите температури и топлотниот бран кој ја зафати државата предизвика и присуство на змии во населени места. Турист од Холандија бил каснат од отровна змија, но во болницата во Охрид немале серум против змиски отров па бил транспортиран во Дебарската болница, каде му бил спасен животот. Зошто во болница во турстички центар нема антивиперин и како ќе се решаваат ваквите случаи во иднина, дали станува збор за моментален недостиг на серум против змиски отров или континуирано се препраќаат пациентите во други болници се прашањата кои ги испративме до Општата болница во Охрид.
– Со оглед на процедурите за набавка , сите потребни ресурси , вклучувајки и серум против змиски отров, се на располагање во ЈЗУ Општа болница Охрид. Во последниот месец сме дале три серуми од кои последниот серум беше даден пред два дена. Со оглед на тоа што процедурите за одобрение за испорака на серумите не се во наша надлежност, истите се испорачани –доставени вчера. ЈЗУ Општа болница Охрид располага со сите серуми и вакцини, велат од Охридската болница.
Во меѓувреме топлото време продолжува, што резултира со зголемена работа на Итната медицинска помош. Доктор Милица Бубало за емисијата Студио 10 на ТВ 24 вели дека деновиве се забележани повеќе повици и интервенции.
Со оглед на високите температури кои ја зафатија територијата на државата и топлотниот бран Министерството за Образование и Наука денес излезе со препораки основните училишта да работат со скратени наставни часови.
– Основните училишта наставата да продолжат да ја реализираат со скратени наставни часови, но да се внимава да се запази суштината на наставната материја која се изучува; училниците и другите простории кои се користат во училиштето постојано да се проветруваат; да се насочуваат учениците и да им се дава можност да конзумираат поголемо количество на вода; да им се препорача на учениците да не конзумираат масна храна и храна која содржи поголемо количество на шеќери за време на училишниот ден, преопрачуваат од МОН.
Ваквите препораки следуваат откако на социјалните мрежи вриеше од коментари на родители за продолжувањето на учебната година, поради пролетниот распуст кој беше реализиран околу Велигден, а дел од реакциите се дека основците на овие високи температури треба да следат настава во неклиматизирани простории.
Инаку, од УХМР најавуваат дека веќе во петок се очекува позначително намалување на температурите за околу 10 степени.
Извор: 24vesti.mk
