ИСТАНБУЛ (АА) – На 6. издание на Фестивал на културата „Етноспорт“, кој се одржува во Истанбул, оддадена им е почит на илјадници деца убиени во израелските напади врз Појасот Газа, јавува Анадолу.
Фестивалот, кој годинава шести пат го организира Светската конфедерација за етноспорт (СКЕ), ги отвори вратите на аеродромот „Ататурк“. Традиционални спортови, ракотворби, детски игри и локални вкусови се изложени на фестивалот, на кој учествуваат приближно 30 земји.
На фестивалот, кој ќе биде домаќин на стотици илјади посетители во период од четири дена, оддадена им е почит на палестинските деца убиени во израелските напади врз Појасот Газа.
По тој повод стотици пара чевли што ги претставуваат децата од Газа беа ставени во подрачјето на кое се одржува фестивалот.
Тулај Ѓокчимен, координаторка на активностите за Палестина, за АА изјави дека на фестивалот се обидуваат на посетителите да им пренесат каква драма се случува во Појасот Газа.
„Ставивме чевли на платото, при што секој пар претставува дете од Газа. Нашето мото е ‘Сите деца заслужуваат да играат и сите деца заслужуваат да живеат и учат’. Се обидуваме тоа да им го претставиме на посетителите. Подготвивме сè за децата што ќе дојдат тука. Газа не е заборавена. Поставивме порака на влезот на која пишува ‘Да беа живи децата од Газа, тие ќе можеа да го посетат овој фестивал токму како тебе’,“ рече Ѓокчимен.
Извор: Anadolu Agency (AA)
