БЕРЛИН (АА) – Германскиот канцелар Олаф Шолц имаше телефонски разговор со израелскиот премиер Бенјамин Нетанјаху, јавува Анадолу.
Во соопштението на портпаролот на германската Влада, Штефен Хебестрајт, се вели дека за време на разговорите Шолц повикал на континуирани напори за одржливо подобрување на обезбедувањето хуманитарна помош и здравствени услуги во Појасот Газа.
Шолц, исто така, рече дека го поздравува предлогот на американскиот претседател Џо Бајден за прекин на огнот во Газа.
Шолц и Нетанјаху, исто така, разменија мислења и за случувањата во регионот на Блискиот Исток.
Германскиот канцелар изрази загриженост поради регионалниот судир.
Американскиот претседател Џо Бајден во петокот изјави дека Израел ѝ доставил на палестинската група на отпорот Хамас договор во три фази со кој ќе се прекинат непријателствата во опколениот Појас Газа и ќе се обезбеди ослободување на затворениците.
Бајден апелираше до Хамас да го прифати договорот и го повика Нетанјаху да се спротивстави на притисокот од членовите на неговата владејачка коалиција што се противат на планот.
Кабинетот на Нетанјаху во петокот ја повтори својата намера да продолжи со нападот врз Појасот Газа додека не се исполнат сите воени цели на Тел Авив.
Хамас соопшти дека позитивно ќе одговори на секој предлог што вклучува траен прекин на огнот, целосно повлекување на израелската војска од Појасот Газа, напори за обнова, враќање на раселените и склучување сеопфатен договор за размена на затвореници.
Израел продолжи со својата брутална офанзива врз Газа и покрај резолуцијата на Советот за безбедност на ОН со која се бара итен прекин на огнот во енклавата.
Извор: Anadolu Agency (AA)
