Во Србија финишира изборната кампања на престојните избори за Собранието на Град Белград, 14 други градови и за 74 локални самоуправи што ќе се одржат во недела на 2 јуни. Овие избори се значајни бидејќи може да го променат политичкиот пејзаж на главниот град, каде опозицијата, и покрај бојкотот на поголемите партии, се надева на победа против владејачката Српска напредна партија (СНС), како и во Ниш, Нови САД и Чачак, јави дописникот на МИА од Белград.
Премиерот на Србија и претседател на СНС, Милош Вучевиќ, изјави денес дека оваа партија на изборите учествува во широк фронт бидејќи, според него, Србија се соочува со големи предизвици, па затоа е неопходно обединување.
-Колку е можно поширок фронтот на сите оние кои се грижат за Србија, без разлика на идеолошките разлики. За мене, секој што ја сака Србија, кој сака независна, слободарска, развиена Србија е добредојден. Го немаме луксузот да се делиме, да дозволиме било кој глас да остане под цензусот во оваа судбоносна ера, поради некакво несогласување, кое објективно не е од суштинско значење, изјави Вучевиќ за весникот „Политика“.
Владеачките партии СНС и СПС на Ивица Дачиќ ќе настапат со една изборна листа во Белград, како и во повеќето други градови, во коалицијата „Александар Вучиќ – Белград утре“ која ја сочунуваат вкупно 13 политички партии.
Во екот преговорите меѓу власта и опозицицијата за изборните услови, дојде до разидување во редовите на опозицската коалиција Србија против наслиството (СПН), по што изборите за град Белград ќе ги бојкотираат Партијата за слобода и правда (ССП), Нов ДСС (НАДА), Срце и Заедно, додека на локално ниво тие ќе настапат согласно одлуките за коалицирање на локалните одбори на овие партии со останатите од СПН.
Опозициските партии од поранешната коалиција „Србија против насилството“ кои нема да ги бојкотират изборите во Белград-Народното движење на Србија, Зелено-левиот фронт/Не го давиме Белград, Демократската партија (ДС), Движењето на слободни граѓани (ПСГ), Еколошкото востание и Новото лице на Србија одат во коалиција со изборната листа „Го избираме Белград–Добрица Веселиновиќ–Милош Павловиќ“.
Добрица Веселиновиќ, кандидатот за градоначалник на опозициската коалиција „Го избираме Белград“ оцени денес дека промената на власта во главниот град е „на дофат“ и ги повика граѓаните на Белград на 2 јуни да излезат на избирачкото место и да гласаат ако сакаат градска администрација да работи во нивни интереси.
-Како што кажавме на почетокот на кампањата, така е и на самиот крај: коалицијата „Го избираме Белград“ оди на избори за да победи. Избравме да излеземе на избори и да се бориме бидејќи секој ослободен град и општина е чекор во вистинската насока, изјави Веселиновиќ за Време.
Како што наведе, обезвластувањето на режимот е долг и комплициран процес кој мора да започне од локалните заедници, било да се тие во Нови Сад, Ваљево, Ужице, Ниш, Вождовац или кој било друг град, град или општина.
Иво Чоловиќ од ЦЕСИД изјави за РТС дека кампањата за локалните избори е поинаква и е помирна од кампањата за декемвриските избори. Според Чоловиќ, на излезноста најмногу ќе влијае фактот што некои од најголемите опозициски партии ги бојкотираат овие избори, особено во Белград.
-Што се однесува до другите градови, постои конфузија, кој излегува, каде излегува, на кои избори излегува. Тоа ќе влијае и на гласачите да потешко донесат одлука кого ќе поддржат на овие избори, вели Чоловиќ.
Според анкетите, постои значителна поделеност меѓу граѓаните на Белград во однос на учеството на изборите. Околу 60 отсто од анкетираните планираат да излезат на избори, додека 40 отсто се за бојкот поради незадоволство од актуелната политичка понуда и опозициските стратегии.
Главните мотиви за излегување на гласање ја вклучуваат желбата да се „одбрани“ сопствената општина или град, додека меѓу оние кои планираат бојкот се истакнува разочарувањето од понудите на опозицијата и перцепцијата дека гласањето нема да донесе значителни промени.
Извор: kurir.mk
