Режисерот Васил Христов во Драмски театар во Скопје ја постави претставата „Хеда Габлер“ според текстот на Хенрик Ибзен, чија премиера е на 20 април (сабота) на сцената „Ристо Стефановски“. Адаптацијата на текстот ја направија Христов и Викторија Рангелова-Петровска, која е драматург и директорка на Драмски.
Христов вели дека во 1890 Ибзен ги скандализирал театарската јавност и воопшто естаблишментот, создавајки уште еден женски лик кој отстапува од востановените општествени норми.
„Хеда Габлер како една од најпознатите (анти)хероини во драмската литература одиграла значајна улога во подигнувањето на свеста за женските прашања. Ибзен создал женски лик кој одбива да живее и да им служи на конвенциите на патријархалното општество. Нејзината борба за автономност и потрага по совршенство, како и нејзината амбиција да поседува ‘машка моќ’ да може да влијае како врз сопствената, така и врз судбината на другите, резултира со убиство на самото совршенство. Нејзиниот чин остава трага кој ја симболизира борбата за родови права и еднаквост“, вели режисерот.
Трајковиќ, Абдула, Ранглова-Петровска, Христов, Арсовска, Љутков и Климоска на денешниот прес. (Фото: СДК.МК)
Насловната улога ја игра Сања Арсовска, која на денешната прес-конференција рече дека станува збор за еден од најкомплексните и најтешки ликови некогаш напишани.
„Отсекогаш посакував да ги играм Хеда Габлер и Медеја, еве ми се исполни за Хеда, за Медеја веројатно ќе треба да почекам уште малку. Особено ме радува што Хеда Габлер ми се случува во овој момент, за некои улоги е потребно да се има како актерска зрелост, така и животно искуство. Мислам дека нема подобар момент. Не би сакала за зборувам за улогата на жената во општестввото, туку за емотивната состојба на жената предизивикана од општествените стеги. Хеда Габлер е тоа што би станала Нора на истиот автор доколку не го напушти и домот. Хеда Габлер ја идентификуваат како женскиот Хамлет со сите дилеми кои ги носи во себе. Направивме еден доста модерен, етстетски специфчен јазик“, кажа Арсовска.
Во екипата се и Зоран Љутков, Владимир Петровиќ, Дениз Абдула и Сара Климоска. Сценограф на претставата е Христов, а костимите се на Розе Трајчевска-Ристоска. „Хеда Габлер“ за првпат се поставува во Драмски.
Б. НЕСТОРОСКА
ИЗВОР: sdk.mk
