Бујар Османи и Арбен Таравари тргнаа решително во трката за претседател на Македонија. Нивните ликови се веќе и на големи билборди.
„Bujar Osmani President Euroipan!“, „Travari President“… Ова се главните зборови на рекламните билборди кои од вчера може да се видат низ Македонија како дел од изборната кампања на претседателските кандидати на коалицијата предводена од ДУИ и коалицијата Вреди. Од она што се пренесува на социјалните мрежи, воочливо е дека натписите се само на албански јазик и негово латинично писмо. Од она што можеше да се види при првата пред конференција – таков е и на специјалниот изборен автобус на Османи.
Зарем заборавија да напишат и на македонски јазик? Ова е прашање на кое двајцата кандидати треба да дадат одговор.
Може, пак, наскоро им е планот да настапат и со македонски јазик оти нели и двајцата велат дека бараат гласови од сите граѓани на Македонија, а и дека сите ги почитуваат и сите ќе ги преставуваат ако бидат избрани?
Инаку, ваквиот однос на двајцата кандидати веќе предизвика и реакции и негодување кај граѓаните на социјалните мрежи. Тие укажуваат дека со ова се крши и Законот за употреба на македонскиот јазик, конкретно неговиот член 7 кој предвидува дека „Задолжително се лекторираат на македонски стандарден јазик и на неговото кирилско писмо: плакати, летоци, проспекти, транспаренти, рекламни табли, реклами на излози или друг вид рекламен материјал…“.
Некои граѓани со свои коментари го потсетуваат Бујар Османи на тоа како своевремено пред пет години вршеше обиколка на државните институции за да провери дали истакнале табли и на албански јазик.
-Каде е Бујар сега да помине и да реагира дали се почитува Законот за употреба на македонскиот јазик, или само е за табли…“, напиша еден граѓанин.
Дали Османи и Таравари ќе реагираат на забелешките останува да се види.
Извор: skopskoeho.mk
