ЕДРЕНЕ (АА) – Во турскиот град Едрене беше организиран голем ифтар на отворено, на кој присуствуваа пет илјади луѓе, јавува Анадолу.
Ифтарот на централниот плоштад Селимије беше организиран од Платформата за соработка со градовите на Балканот при Канцеларијата на гувернерот на Едрене, град недалеку од границата со Грција и Бугарија.
Претседателот на Управата за верски прашања (Дијанет) на Туркије, Али Ербаш, во обраќањето до присутните рече дека е среќен кога гледа дека верниците заедно ги пречекуваат ифтарите.
Тој нагласи дека Рамазан е месец на заедништво и солидарност и дека исламската цивилизација се залага за љубов и почит.
„Нашата цивилизација е цивилизација што на светот му го носи искуството на заедничкиот живот во мир со луѓе што имаат различни верувања и култури. Балканот е токму еден од најважните региони каде што ова искуство навистина се случува“, рече тој.
Гувернерот на Едрене, Јунус Сезер, истакна дека токму овој турски град претставува крстосница на патишта, граници, реки и култури и дека ја поврзува Европа со Азија.
„Вечерва со нашите браќа, пријатели и сонародници од Балканот му се радуваме на ифтарот. На ифтарска трпеза се собравме припадници на различни религии, нации и култури. Ова единство е одраз на богатството на географското подрачје на Балканот“, рече Сезер.
Челникот на Дирекцијата за дијаспора и сродни заедници на Туркије (YTB), Абдула Ерен, истакна дека оваа организација им дава поддршка на сонародниците од Балканскиот Регион со образовни, културни и социјални проекти.
Покрај турските претставници, на ифтарот присуствуваа и дипломатски претставници на Северна Македонија, Хрватска, Бугарија, Романија и други земји, верски претставници на Црна Гора, Србија, Албанија и голем број граѓани од Балканот и жители на Едрене.
Извор: Anadolu Agency (AA)
