Градоначалникот на Арачиново е неповреден во вооружената престрелка во која од автоматско оружје било пукано кон него. На влезот на селото има силно полициско обезбедување, кое ги контролира сите возила кои влегуваат во Арачиново. Полиција го чува и местото на престрелката.
Министерството за внатрешни работи (МВР) попладнево и официјално го потврди вооружениот инцидент во кој повредени се двајца блиски соработници на градоначалникот Ридван Ибраими.
– На влез во село Арачиново машколице со автоматска пушка пукало кон градоначалникот Ридван Ибраими, кој бил заедно со неколку лица. При тоа повредени се две лица кои биле заедно со градоначалникот. – велат од МВР.
Од МВР ги демантираат шпекулациите што се појавија во дел од медиумите дека во инцидентот е повреден полициски службеник.
Еден од повредените, кој се здобил со прострелни рани во градниот кош, е пренесен во Ургентниот центар во Скопје, а другиот, со рана на десното рамо, е примен во Клиниката за хируршки болести „Свети Наум Охридски“. Од Ургентниот центар потврдуваат дека едно лице од Арачиново е донесено со рани од огнено оружје и истото е веднаш внесено во операциона сала.
Пукањето во Арачиново денеска е главна вест и во медиумите од регионот.
Извор: 24vesti.mk
