Сите глобални климатски рекорди беа срушени минатата година, предупреди во вторникот Светската метеоролошка организација (WМО), изразувајќи особена загриженост поради затоплувањето на океаните и топењето на морскиот мраз.
Во својот годишен извештај за состојбата на глобалната клима, WMO истакна дека просечните температури го достигнале највисокото ниво во последните 174 години мерење – 1,45 степени Целзиусови над прединдустриските нивоа.
Температурите на океаните се највисоки во последните 65 години, а повеќе од 90 отсто од морето доживува топлотен бран.
„WМО прогласува црвен аларм за светот“, изјави генералниот секретар, Селесте Сауло, која ја презеде функцијата во јануари.
Она што го доживеавме во 2023 година, особено невиденото затоплување на океаните, повлекувањето на глечерите и губењето на морскиот мраз на Антарктикот, е причина за особена загриженост.
Климатските промени, предизвикани од согорувањето на фосилните горива, заедно со климатскиот феномен Ел Нињо, соборија рекорди во 2023 година.
Научниците предупредуваат дека 2024 година може да биде полоша бидејќи Ел Нињо ги зголемува температурите.
Во извештајот се предупредува на големо намалување на морскиот мраз на Антарктикот. Највисокото измерено ниво беше за милион квадратни километри помалку од претходниот рекорд, приближно колку Египет.
Тој тренд, во комбинација со затоплувањето на океаните што предизвикува ширење на водата, придонесе за повеќе од двојно зголемување на нивото на морето во изминатата деценија во споредба со периодот од 1993 до 2002 година, според WМО.
Топлината беше концентрирана во Северниот Атлантик, каде што температурите беа просечни 3 степени Целзиусови над просекот до крајот на 2023 година, се вели во извештајот.
Повисоките температури на океаните влијаат на чувствителните морски екосистеми и многу видови риби избегаа северно од областа во постудени води.
Извор: alsat.mk
