Албанската опозиција го обвинува техничкиот премиер Талат Џафери дека не може да донесе напредок за ниту едно прашање за Албанците. Се претворил во инспектор кој има авторитет само врз административните службеници. Блерант Рамадани од коалицијата Вреди смета дека премиерот Албанец од ДУИ не е ништо друго, освен симболика без конкретни резултати. Според Вреди, тоа се докажало и кога Џафери бил прашан зошто во специјалната единица Тигри нема Албанец, а тој одговорил дека тоа не е негова надлежност.
„Ако тоа е надлежност на Министерството, тогаш каде беа вашите министри како Агим Нухиу и Земри Ќамили, кои имаа соодветна надлежност за ова прашање, но кои воопшто не беа заинтересирани за прашањето за специјалната единица Тигри, каде за Албанците вратата и понатаму останува затворена. За Албанците нема поголема навреда од тоа да имаат министер Албанец за образование, а од друга страна, учениците Албанци да не можат да ја следат наставата на својот јазик; нема поголема навреда од тоа да имаш министер за финансии Албанец, додека на албанските населби им се доделуваат скандалозни буџети, а нема поголема иронија од ситуација со премиер Албанец кој нема ниту овластување, ниту соодветен легитимитет да ја објасни дискриминацијата каде ниту еден Албанец не е вработен во една толку важна единица за националната безбедност на нашата држава“, рече Блерант Рамадани, „Вреди“.
Извор: alsat.mk
