Повеќе од 1.000 готвачи, келнери, шанкери, собарки и друг помошен персонал од Непал, Филипини и Малта ова лето ќе дојдат да работата на Охридско-струшкото крајбрежје. Нема ресторан или хотел кој не е во потрага по работници од трети држави за да го надополнат недостигот на кадар. Проблемот почна да се појавува последниве неколку години откако локалниот персонал масовно почна да заминува на работа во Хрватска за повисоки плати.
„Околу 1.100 вработени ќе има на цела Охридска ривиера со веќе завршени процедури и треба да дојдат. Кога правите споредба платата што би ја дале на овдешен работник и на некој од Непал, не ви доаѓа поефтино да ги платите овдешните работници? Ние им ја даваме истата плата, дури и повеќе, но кај нас има некој тренд за заминување на децава со некои други надежи. Инаку платите се солидни“, рече Муса Рашид- сопственик на хотел во Охрид.
Само во хотелот на Рашид од први мај со работа ќе почнат 18 лица од овие далечни држави. Сите неопходни процедури се веќе завршени.
„Ние мора да бараме варијанти и најдовме варијанта од Непал, Филипини и Малта работници и доаѓаат да работат кај нас. Почнуваме со 18 вработени од различна фела, кувари, помошници, келнери кои знаат јазик и се надеваме дека ќе имаме успешна сезона“, додаде тој.
„Тоа е неминовно. Ако имаме напуштање на работна сила, мора тоа од некаде да се пополни. Ние имаме огласи отворени никој не се јавува, не само ние, нема некој што денес не бара кувар, келнер, собарица, чистачка“, нагласи Крсте Блажески-претседател на ХОТАМ.
Оваа тура на странски работници ќе биде донесена со помош на агенција од Србија, која посредува при вработување на ваков кадар. Хотелиерите бараат државата да ја зголеми квотата за увоз на ваков кадар и да се поедностават процедурите за визи./Алсат.мк
Мики Трајковски
Извор: alsat.mk
