реклама
Наставниците и професорите годинава за првпат го уживаат право на исплата на регрес или како што е познато во јавноста, тринаесетта плата. Но, наставниците од основните училишта во Арачиново се уште не го добиле регресот за крајот на годината. Наставниците од ОУ „Ѓерѓ Кастриот Скендербег“ велат дека Министерството за финансии и ги пуштило средствата на општината, но општината се уште не ги префрлила во училишните буџети. Иако рокот за исплата на регрес е до утре, поточно до 27 декември, наставниците стравуваат дека ќе останат без истиот. Официјален одговор бараат од општината.
-Општината како општина оцени дека проблемот е наводно во училиштето. Како училиште имаме документирано е врз основа на документи, законски и институционално, дека проблемот не е кај нас. Сега за причините зошто средствата остануваат во општината и не им се даваат на наставниците, на различни начини сме информирани, ние како наставници не можеме да разбереме каде лежи проблемот. Од која причина?-вели Локман Ајдари.
-Да бидам искрена, рокот е до утре. Од страна на општината ни рекоа дека до денеска ќе ни дадат одговор, но се гледа дека само ги одложуваат деновите, од денеска за утре. Ова го кажуваат веќе две недели. Овде сме собрани за она што ни припаѓа. Ништо друго не бараме освен од општината каде што ни се парите. Размислуваме и за бојкот доколку не се изврши плаќањето, иако тоа не е вистинското решение-изјави Лифе Рамадани.
Градоначалникот на општина Арачиново, Ридван Ибраими вели дека исплатата зависи од управата на училиштето. Според него, надлежните од училиштето не ги ни предвиделе средствата од ноемвриското покачување на платите.
-Имаше исплата од буџетскиот сектор во училиштето „Ѓ.К.Скендербег“. Не се предвидени потребните средства за ноемвриската плата годинава. Во тие средства, за да ја реализираме ноемвриската плата, требаше да ги издвоиме средствата од регресот, за да ја реализираме платата. Бидејќи средствата ги обезбедивме на комплементарен начин со одлука на советот и за регресот, но Министерството за финансии не ни дозволи да ги префрлиме средствата на соодветна сметка за да се реализира регресот-изјави Ридван Ибраими.
Ибраими ветува дека исплатата на регресот ќе се изврши во текот на месец јануари, штом се најде вистинскиот начин во соработка со Министерството за финансии. Друга пречка за трансферот на средства според Ибраими е процесот на одвојување како субјект на основното училиште „Абдил Фрашери“, за што од наредниот период средствата ќе се пуштаат во посебен буџет. Наша екипа го посети и ова училиште, но директорот и наставникот не сакаа да зборуваат бидејќи, како што велат, постигнале вербален договор.
реклама
