Шефот на набљудувачката делегација на изборите во Србија: Имаше ливчиња што се направени на фотокопир и на кои има печат

Изборите во Србија не биле спроведени фер, а со гласовите било манипулирано, рече Штефан Шенах, шефто на делегацијата на Парламентарното собрание на Советот на Европа, која ги набљудуваше изборите во Србија, кој додаде дека сето ова е проблем за земја која сака да оди по демократски пат. 

„Она што го видовме беше кампања во која доминираше претседателот. Тоа не е работа на претседателот. Претседателот е неутрална личност која треба да гарантира за земјата и за сите луѓе. Но, актуелниот претседател раководеше со изборите и беше кандидат на сите нивоа, без разлика дали тоа беше село или се работеше за целата република“,

изјави Сенах.

„To nisu bili fer #izbori. Bili su nepošteni. I ako mene pitate kao političara, mislim da je pobeda u Beogradu ukradena opoziciji“, kaže za DW šef posmatračke misije Parlamentarne skupštine Saveta Evrope @stefanschennach pic.twitter.com/ED1wfFummM

— DW Српски/Srpski (@DW_Srpski) December 19, 2023

Сепак, нагласи дека делегацијата на Парламентарното собрание на Советот на Европа ги следела само парламентарните, а не и белградските избори.

„Ако мене ме прашате како политичар, сметам дека победата во Белград ѝ е украдена на опозицијата“,

додаде тој.

Според него, при пребројувањето на гласовите видел дека има ливчиња што се направени на фотокопир и на кои имало печат.

„Тоа треба да го истражи полицијата“,

посочи тој.

Запрашан за изјавата на Владимир Билчик од ЕП, кој ги следеше изборите и рече дека поминале без проблеми, Сенах вели дека партнерството и демократијата не се засноваат на убави зборови, туку на вистина.

„И вистината беше малку шокантна за она што се случуваше“,

рече Сенах.

Според извештајот на ОБСЕ/ОДИХР, во изборната кампања било забележано присуството на претседателот на државата, а имало и многубројни тврдења за заплашување и малтретирање граѓански активисти, борци за човекови права и новинари.

Германија оценува дека неправилностите што ги утврдиле меѓународните набљудувачи на парламентарните избори во Србија се неприфатливи за земја која претендира да ѝ се приклучи на Европската Унија.