ИСТАНБУЛ (АА) – Околу 830.000 луѓе раселени во Појасот Газа поради израелските напади се сместени во 154 објекти кои и припаѓаат на Агенцијата на Обединетите нации за помош на палестинските бегалци на Блискиот Исток (УНРВА), известува Анадолу.
Во писмената изјава што ја објави УНРВА се наведува дека од 7. октомври околу 1,6 милиони луѓе се раселени во различни делови на Појасот Газа.
Во соопштението се вели дека околу 830.000 од овие луѓе се засолниле во 154 објекти на УНРВА, вклучувајќи ги и оние во северните региони.
УНРВА соопшти дека дневно ѝ се потребни 160.000 литри гориво за извршување на нејзините основни хуманитарни активности.
„Во Газа сега ни е потребен прекин на огнот и гориво. Доколку чекаме уште, ќе видиме дека главна причина за умирањето на луѓето ќе биде недостатокот на гориво“, рече во четвртокот генералниот секретар на УНРВА, Филипе Лазарини.
Израел спроведува немилосрдни воздушни и копнени напади на Појасот Газа со неселективно бомбардирање на цивилни населби, станбени објекти, џамии, цркви и болници по неочекуваниот напад од страна на Хамас на 7. октомври.
Оттогаш во овие израелски бомбардирања се убиени повеќе од 12.000 Палестинци, од кои над 5.000 деца и 3.300 жени, а 30.000 лица се ранети.
Во соопштението се наведува дека околу 3.750 луѓе се водат за исчезнати, од кои 1.800 се деца.
Во израелските бомбардирања животот го загубија и 200 медицински лица, 22 припадници на цивилната одбрана и 51 новинар.
