На новинарско прашање дали на еден месец пред одржување на декемврискиот Самит на лидерите на ЕУ, шансите да преминеме во втората фаза од преговорите ни се пропуштени, Османи посочи дека овој геополитичкиот момент е неповторлив за сериозна брза патека за членство во 2030 година и не е сигурен дали истиот ќе биде сочуван и следната година
Усвојувањето на уставните измени е единствена домашна задача која нѐ дели од забрзаната евроинтеграција, која сѐ повеќе станува императив за самата Европска Унија во дадениот геополитички момент. Ова денеска го посочи министерот за надворешни работи по прес-конференцијата со неговата колешка од Романија, Луминица Одобеску.
На новинарско прашање дали на еден месец пред одржување на декемврискиот Самит на лидерите на ЕУ, шансите да преминеме во втората фаза од преговорите ни се пропуштени, Османи посочи дека овој геополитичкиот момент е неповторлив за сериозна брза патека за членство во 2030 година и не е сигурен дали истиот ќе биде сочуван и следната година.
„Откако завршува скринингот, доаѓаат скрининг-извештаите. Врз основа на нив, подготвуваме патокази, кои се обврска за отворање на поглавјата. Има еден чекор кој е важен, кој се носи со консензус, а тоа е писмо од Европскиот совет до земјите кандидати кои се бенч маркови за отворања на поглавјата и кои се т.н. интерни бенч маркови. Писмото за Република Северна Македонија помина, со консензус од сите 27 земји членки. Врз основа на тоа писмо, ги подготвуваме патоказите до Европската комисија и потоа Европската комисија ги доставува до Европскиот совет“,
објасни тој.
Според него, без уставните измени нема да можеме да ја одржиме втората меѓувладина конференција на која ќе се презентира преговарачката рамка со цел понатаму да се отвораат поглавјата.
„И тука целосната одговорност, историска одговорност ќе ја носат одредени пратеници во Собранието и одредена политичка партија. Секој од нас треба да впери прст кон тие луѓе и кон таа политичка партија која ни ја загрозува европската иднина. Овој геополитичкиот момент е неповторлив за сериозна брза патека за членство во 2030 година и не сум сигурен дали истиот геополитички моментум ќе биде сочуван и следната година“,
заклучи Османи.
Но, рече и дека не може од сега да каже дека ја пропуштаме шансата.
„Сметам дека треба да работиме до последниот здив, до последниот камен пред нас за да ги направиме уставните измени и да фатиме исчекор со оваа шанса. Но, ако не успееме ќе треба со име и презиме да ги кажеме тие што ја загрозуваат европската иднина, што го кочат просперитет на оваа држава, што го кочат владеењето на правото и го кочат животниот стандард. Тие луѓе ќе треба да бидат кажани со име и презиме“,
посочи Османи.
Во насока на тоа дали ја пропуштаме шансата за декемврискиот Самит на ЕУ, Османи го посочи примерот со Бугарија.
„Во односот со Бугарија имаше две алтернативни патеки, или историско-идентитски дискурс или малцинско-човековите права. Трета опција немаше, трета опција беше прекин на комуникација, прекин на процесот на европска интеграција. Ние ја форсиравме втората патека, односно за малциснко-човекови права, зашто тоа е наш терен. Ја отфрливме историско-идентитетската траекторија. Затоа уставните измени како парадигма на малцинско-човечките права и тој акциски план кој е дел од патоказите се нашиот избор во дискурсот со Бугарија. Доколку не го прифативме овој дискурс, ќе требаше да разговараме за историски и идентитетски прашања“,
додаде тој.
Затоа смета дека секој што се противи на оваа траекторија сака да не врати на историско-идентетскиот дискурс.
„И тука ми е делумно и сомнежот, освен класичка политичка и партиска агенда, на најмонструозен начин да се злоупотребат емоциите на граѓаните. Не знам дали се свесни што прават. Со оневозможување на малциско-човековите права во дискурс со Република Бугарија ни го враќаат во агенда другиот дискурс. Освен доколку немаат намера за тоа. Не можам да кажам дека дека во оваа фаза ни е пропуштена шансата. Секој ден, секоја минута секоја секунда треба да се искористи за да се искористи овој неповторлив геополитички момент“,
заклучи Османи.
ИЗВОР: 360stepeni.mk
