ГАЗА (АА) – Најмалку 11.320 Палестинци загинаа во израелските напади на блокираниот Појас Газа од 7 октомври, а од нив 4.650 се деца и 3.145 се жени, известува Анадолу.
Прес-службата на Владата во Газа информираше и дека во израелските напади се ранети најмалку 29.200 лица.
Истиот извор објави дека уште 3.600 луѓе се водат за исчезнати под урнатините на зградите во Појасот Газа, вклучувајќи 1.755 деца.
„Во израелските напади загинаа и најмалку 198 медицински лица, 22 припадници на цивилната заштита и 51 новинар. Израелската агресија исфрли од употреба 25 болници и 52 здравствени центри, додека 55 возила на итната помош биле цел на израелските сили“, се наведува во соопштението.
Канцеларијата за медиуми соопшти и дека најмалку 40 пациенти починале во болницата Ал Шифа во Газа изминатите 5 дена поради израелската опсада и недостатокот на гориво.
