реклама
Војната во Украина донесе нов геополитички и безбедносен контекст во Европа, по што по долги години проширувањето повторно беше ставено на врвот на агендата, но на неочекуван начин, рече претседателот Стево Пендаровски, говорејќи на Балканската лидерска конференција на тема „Интеграција на Западен Балкан во ЕУ – Предизвици и перспективи“. Според него, доделувањето кандидатски статус на Украина и на Молдавија е направено во време кога нема напредок во разговорите со Србија и Црна Гора и кога постои ризик скринингот со Северна Македонија да заврши пред почетокот на разговорите.
Поранешниот претседател Бранко Црвенковски рече дека со Македонија се направени сите можни преседани и покажан е недостиг на принципи од страна на ЕУ за почитување на основните вредности на ЕУ. Тој го критикуваше бавниот напредок на неопходните процеси во земјава, но и ЕУ, која декларативно се изразува за проширување, но не е подготвена да го стори тоа. Тој предложи земјите од Западен Балкан да побараат од Европската Унија постепена интеграција пред полноправно членство.
реклама
Поранешниот претседател на Албанија, Алфред Мојсиу изјави дека пред да се зборува за интеграција, Западен Балкан мора да стане побезбеден. Изрази загриженост за, како што рече, небезбедноста која континуирано се создава во овие земји. Тој тоа го поврза со терористичкиот напад во Бањска на северот на Косово.
„Не само што пукна, туку се случија некои работи, за мене чудно неразбирливи, кога Белград, кој барем формално изгледаше како да се грижи за проблемот меѓу Косово и Србија да се реши мирно и правично, зазема многу вознемирувачки став. Настан кој не шокираше сите, не само што не беше осуден од лидерите на Србија, туку беше прогласен и за ден на жалост за загинатите, кои Косово и ЕУ со право ги нарекоа терористи“, вели Алфред Мојсиу.
реклама
На Балканската лидерска конференција говореа и многу други државни лидери и други претставници. Конференцијата ја организираа Клубот од Подгорица и Федерацијата за Универзален мир.
реклама
