В петок, на 13 октомври во 19.00 часот во КСП Центар Јадро ќе биде отворена изложбата на цртежи и акварели кои култниот американски, независен, филмски режисер, Џон Џост ги изработи за време на неговиот престој во Скопје.
Oд крајот на септември во КСП Центар-Јадро гостува култниот филмски режисер Џост. За време на својот престој во Јадро тој одржа филмска работилница „Learn everything there is to know from a real MoFo“. Кратките филмови, кои учесниците ги изработија со Џост ќе бидат проектирани на 13 октомври во 19 часот во КСП Центар-Јадро.
За своите цртежи Џон Џост вели:
Изложените акварели јас ги доживувам како експерименти. Не мислам дека тие се ‘уметност’, туку се можеби повеќе обид или проба што може да доведе до правење ‘уметност’.
Џон Џост е еден од најплодните и најзначајните американски независни филмски автори. Самоук е. Има снимено 41 долгометражен филм во периодот 1963-2013 година, како и повеќе од 30 краткометражни филма, кои сите ги има сам осмислено, напишано, снимено, режирано и монтирано; повеќето и продуцирано. Од 1996 година работи само во дигитално видео (DV и HD), завршувајќи 24 долгометражни и многу краткометражни дела, како и една голема инсталација на 7 екрани, TRINITY, претставена во ZKM, Карлсруе, Германија. Има изведено и неколку други инсталации што досега не биле јавно презентирани. Во јануари 1991 година во Музејот на модерната уметност (МоМА) во Њујорк е прикажана ретроспектива на неговото дотогашно творештво.
Два од неговите најпознати филмови се „Сите дела на Вермер во Њујорк“ (1990) и „Креветот во кој спиеш“ (1993). Неговиот долгометражен филм од 1977 година, „Последни песни за бавен танц“ е наведен во книгата „1001 филм што мора да ги погледнете пред да умрете“. Џост се занимава и со фотографија и сликарство и пишува и свири кантри вестерн песни.
Програмата е реализирана во соработка помеѓу КСП Центар-Јадро, MI Film&Theatre и Кинотека на Македонија, а е финансиски поддржана од Министерство за култура на РС Македонија.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
ИЗВОР: republika.mk
