ХАМАС ја презема одговорноста за ракетниот напад кој рано утринава се одвиваше во јужниот и централниот дел на Израел. Ракетите биле испратени од појасот Газа, а покрај ракети, медиумите јавуваат дека вооружени лица се инфилтрирале на територијата на Израел
Високиот воен командант на Хамас, Мохамед Деиф го најави почетокот на нападот на медиумите кои се поврзани со оваа организација, повикувајќи ги сите Палестинци да земат оружје и да се борат, пренесува Ројтерс. Тој изјавил и дека ова ќе биде денот на најголемата борба и последен ден од окупацијата на Палестина.
Во меѓувреме, израелската војска прогласи воена состојба, а високи воени претставници изјавија дека Хамас ќе се соочи со последиците за случувањата. На населението кое живее во нападнатите региони им е наредено да останат во своите домови, а поради големиот број испукани ракети, отворени се и скривници.
„Израелската војска објавува воена состојба. Дојде до широко распространување на ракетен оган врз израелска територија од Газа, а терористите се инфилтрирале на територијата на Израел на неколку влезни места. Израелските граѓани на југот и централниот дел од земјата треба да останат во безбедни простори“,
се вели во соопштението на израелската војска.
Како резултат на нападите загина една жена, а повредени се 16 лица од кои две лица се во критична состојба. Во градот Тел Авив, според израелските медиуми, директно била погодена станбена зграда, а во градот биле запалени и десетици возила. Вооружените напаѓачи отвориле оган и во градот Сдерот на југот на Израел, каде во моментот се водат улични битки помеѓу израелските војници и припадници на ХАМАС.
ИЗВОР: 360stepeni.mk
