Агелер со порака до власта – „Законот за амнестија да е транспарентен, ќе го следиме процесот“

За Соединетите Американски Држави и американската амбасада е важно процесот на законот за амнестија да се одвива легално и транспарентно. Ова го изјави американската амбасадорка Анџела Агелер која порача дека политичарите треба да ја запознаат јавноста зошто се носи таков закон и која е неговата улога.

„Најважната работа за амбасадата на САД е процесот да биде легален и транспарентен и граѓаните во земјата треба да разберат што се случува и зошто тоа се случува и нивните избрани лидери да комуницираат со нив зошто е тоа важно. Ова не е прв закон за амнестија, секако нема да биде последен и ние одблизу ќе го следиме процесот“, вели Анџела Агелер.

Законот од вчера влезе во собраниска процедура со скратена постапка но без европско знаменце и уште веднаш им беше распределен на пратениците. Сепак се уште нема најава кога ќе се најде законот на комисиска расправа. Од ВМРО-ДПМНЕ и денеска најавија дека ќе го блокираат законот со поднесување голем број амандмани.

„Немаме точна бројка но ќе бидат доволно за законот да не се донесе. Затоа што сметаме дека законот за амнестија е политички проект на власта за трговија со влијание да се даде амнестија на осудени криминалци а за возврат да се добие поддршка во предизборната кампања за вршење на валканите работи во текот на изборите“, вели Антонио Милошоски.

Против ова законско решение е и здружената албанска опозиција. Фадиљ Зендели од Беса повтори дека тие сметаат дека тој се носи за политички маркетинг пред избори.

„Општ впечаток е дека се прави овој предлог закон од политички побуди на власта, неспорно е дека е од политички побуди, интереси на власта за овој закон, но во суштина се работи за луѓе навистина казнети за правосилни одлуки, но сепак се работи за човечки суштества за кои некогаш и треба да имаме сфаќања но никако не можеме да имаме сфаќања за криминалот за корупцијата. Значи правиме анализи, во моментот кога ќе почне дебатата и ќе имаме став“, вели Фадиљ Зендели.

Вчера премиерот Ковачевски најави дека и пратеничката група на СДСМ ќе поднесе амандмани во насока на прецизирање на неговата важност за дела кои се од помал обем, со што ќе бидат исклучени случаи за кои се предвидени повисоки затворски казни. Со ова тој јасно стави на знаење дека со овој закон за амнестија нема да биде опфатен случајот Монструм.