„Ние како никогаш досега го помагаме развојот на спортот во општина Бутел. Денеска одвоивме 3 милиони и 500 илјади денари за спортските клубови кои гравитираат во нашата општина“. Ова го напиша градоначалникот на општина Бутел, Дарко Костовски на својата официјална страница на социјалната мрежа Фејсбук.
Според него, распределбата на финансиските средства е направена низ една максимално транспарентна процедура со објавен јавен повик врз база на правилник.
„Искрено се надевам дека овие финансиски средства ќе им помогнат на спортските клубови и ќе стимулираат нови национални, балкански, европски и олимписки шампиони. Спортот е клучен фактор за развој на поквалитетно и поздраво општество, додека високите спортски резултати како ништо друго помагаат да се изгради нацијата и државата“, напиша понатаму Костовски.
Градоначалникот на општина Бутел, Дарко Костовски, исто така информираше дека општината со која он раководи е најспортската општина во Македонија доколку се избројат постигнатите спортски успеси, не заборавајќи да напомене дека наскоро Бутел ќе биде шампион и во спортската инфраструктура.
Костовски рече дека тој и неговиот тим од општина Бутел ќе бидат цврст партнер на сите спортисти и спортски клубови од општината.
