ПРИШТИНА (АА) – По убиството на полицаецот во селото Бањска во општината Звечан, во Приштина е свикан состанок на Советот за безбедност на Косово, потврди косовскиот премиер Албин Курти, пренесува Анадолу.
Советот се состана во 10 часот, по убиството на косовскиот полицаец во северниот дел на земјата и по ранувањето на друг.
Курти ова го објави по посетата на ранетиот полицаец Албан Рашит, кој е успешно опериран.
„Операцијатa на отстранување на гелер од леватa рака на полицаецот Албан Рашит успешно е изведена утрово. Гелерот е од рачна бомба која криминалците оркестрирани од Србија ја фрлија кон косовската полиција за време на терористичкиот напад кај мостот во селото Бањска кај Звечан. За време на посетата на Хируршката клиника при Клиничкиот центар, се запознав и со семејството на Албан, која пристигна од Велекинце, Гнилане. Повредениот полицаец денес ќе биде отпуштен од болница“, рече Курти.
Курти утринава на социјалната мрежа Фејсбук објави дека е убиен припадник на регуларната полиција, а ранет е друг од граничната полиција на Косово.
„Напаѓачите се професионалци кои носеле маски и биле вооружени со тешко оружје. Го осудуваме овој криминален и терористички напад. Организираниот криминал со политичка, финансиска и логистичка поддршка на официјален Белград, ја напаѓа нашата земја. Во оваа борба ние ги браниме и почитуваме законите, ги штитиме своите граѓани без разлика и ја браниме независноста на Косово“, напиша Курти на Фејсбук.
Тој додаде дека извршителите и нивните налогодавачи ќе „паднат, ќе бидат приведени, процесуирани и казнети.“
Полицијата на Косово потврди дека нападот врз нејзините припадници се случил во северниот дел на земјата, во раните утрински часови.
Во полициското соопштение се наведува дека нападот почнал со поставување на два камиони без регистерски таблички на мостот пред влезот во селото Бањска, со што бил блокиран влезот.
„Полициската станица во Звечан, по добиените информации упатила три регуларни единици во правец на споменатата локација. Штом пристигнале близу местото на пријавената блокада, наишле на отпор, во кој неколку луѓе пукале од различни видови оружје“, се наведува во соопштението и се додава дека се користени и рачни бомби.
