АНКАРА (АА) – Министрите за надворешни работи на ЕУ наскоро ќе одржат состанок во главниот украински град Киев, изјави денес шефот за надворешна политика на Унијата, Жозеп Борел, јавува Анадолу.
„Во Украина, непосреден приоритет е мирот, но праведен мир“, изјави Борел за новинарите на маргините на Генералното собрание на ОН во Њујорк, по неформалниот состанок на министрите за надворешни работи на ЕУ.
Тој го критикуваше рускиот претседател Владимир Путин дека директно ги напаѓа резервите од храна, велејќи: „Наскоро, во наредниот период, во Киев ќе свикаме состанок на министрите за надворешни работи.“
Борел ја коментираше и ситуацијата во Сахел, за каде што ЕУ се согласи да ги преиспита својата стратегија, пристап и политики.
Тој укажа на „геополитичката нестабилност“ во африканскиот регион и рече: „Ние сме директно погодени од настаните во Сахел како соседи, како партнери. Ова, исто така, е причината зошто миграцијата и безбедноста се клучни елементи.“
Борел повтори дека африканските проблеми бараат африкански решенија и ЕУ е „подготвена да ја поддржи понатаму Африканската унија и Економската заедница на западноафриканските држави“.
Тој уште еднаш ја изрази поддршката на ЕУ на нигерискиот претседател Мохамед Базум, кој беше соборен од воената администрација на 26 јули.
