реклама
Скандалот со Клиниката за онкологија што ја потресе цела јавност, за премиерот Ковачевски е грозен случај во кој, како што истакна нема да биде поштеден никој кој е вмешан во него. Рече дека очекува да се спроведе професионална и брза истрага со што ќе бидат идентификувани виновниците. Воедно побара овој случај да не се користи во политички цели .
„Овде се работи за мултипартиски, мултиетнички криминал кој што мора да се расчисти. Тоа што граѓаните протестираат јас ја разбирам и нивната загриженост и нивниот бес. И правото на протест во вакви случаи е добредојдено, затоа што врши дополнителен притисок врз институциите побрзо да ја завршат својата работа. Но уште еднаш повикувам случајот да не се политизира.“, рече Ковачевски.
Ковачевски додаде и дека нема да се дозволи во овој случај да има било какво политичко влијание.
„Никој не смее да врши никакво влијание и никаков притисок во овој случај. Нема да се дозволи никаков притисок, ниту политички, ниту етнички, ниту било каков друг. Инволвираните ако сакаат нека бидат членови и на свети СДСМ и на свето ВМРО и на свети ДУИ тој што се огрешил има да одговара.“, изјави Ковачевски.
И претседателот на ВМРО-ДПМНЕ Христијан Мицкоски вели дека е згрозен од тоа што се случувало, но и за овој случај тој побара оставка од Владата и брзи предвремени избори.
„Сведоци сме на едно криминално-монструозно-мафијашко здружување на неколкумина медицинска лица блиски до партиите на власт. Она кое што згрозува е, за да се богатат. Затоа е потребна одговорност, не само кривична, туку и политичка, и затоа ако има барем малку човечност кај луѓето во Владата треба веднаш да си поднесат неотповиклива оставка и да може да излеземе пред граѓаните на брзи парламентарни избори“, рече Мицкоски.
И претседателот на државата Стево Пендаровски реагираше за овој скандал за кои се сторени тешки дела против здравјето на луѓето и повика на брзо и ефикасно комплетирање на истрагата од МВР и Јавното обвинителство. Фрапантни и згрозувачки се информациите за сомнежи за злоупотреба на терапијата на лицата болни од рак, стои во реакцијата на претседателот Пендаровски.
реклама
реклама
